Ons het die naweek by Dimalachite Karavaan Park deurgebring, tydens die Parys Crater Cruise Fiets wedren. Registrasie: Baie goed, betalings per EFT, res in kontant by aankoms (hulle aanvaar nie kredietkaart nie) Roete: Maklik om te kry, maar die laaste 7 kilometers is swak grondpad. Aankoms: Goed. Vriendelike mense, sekuriteitswag baie hulpvaardig (en praat Afrikaans!) Staanplek: Daar is 'n keuse of jy by die rivier wil staan , of verder weg. Aangesien ons fietsryers is (nie tyd om te gaan visvang nie <;=))het ons 2 staanplekke weg van die rivier verkies. Party staanplekke het baie meer koelte as ander - my fietsry vriend het heerlike koelte gehad, terwyl ons in die son gebak het die heel dag. Staanplekke word toegewys, so jy kan nie 'n "lekker" plek uitsoek nie. Baie wind het ons gevang - kyk na die rigting waarin die wind waai (of die bome lê), en slaan jou seile dienooreenkomstig op! Ons het op die swaar manier geleer! Baie muggies, miere en rysmiere. Kry vir jou 'n gogga vanger vir gemoedsrus - die goed vreet jou op! Pragtige voëllewe- die koringvoëltjies is te pragtig en mak! Geen visvangers ("Malachite Kingfisher") gesien nie Ablusies: Netjies en skoon, maar geen elektriese proppe vir mans se skeermes nie, geen aparte urinane ("fluitplek") nie, dus staan jy en wag dat een van die 2 (twee!) beskikbare toilette oop is! (Nou weet ek hoekom my vrou partykeer so bleek word as sy in die ry moet staan)Van die slotte is gebreek, water is warm, matjies op die vloer. Toiletpapier word gereeld vervang. Geriewe: Pragtige swembad, (wat nie toegespan is nie - is dit nie onwettig nie?) groot ontspanningsarea, lekker kroeg met groot TV skerm (rugby kyk!), borrelbad waarvoor jy ekstra betaal. Baie mooi braai areas voor elke staanplek, wat gereeld skoongemaak word. Baie lekker speelplek vir die kinders, klimrame ens. Sekuriteit: Ooglopend goed, aangesien min buitestaanders inkom. Lawaai in die nag (nieteenstaande GROOT tekens buite wat vertel lawaai, musiek, radios ens. word nie toeglaat nie) het egter hierdie leemte ontbloot - die telefoon word nie beantwoord nie, en die klompie langs ons het eers 02:30 tot ruste gekom .... en ons moes die Saterdag 103 km bergfiets gaan ry - nie snaaks nie! Was darem baie stiller die volgende nag, aangesien die toesighouer(s) ingetree het Waarde vir geld? Vir wat ons gekry het, teenoor die prys, (R 115,00 p.p.p.n.)was dit sekerlik nie te goedkoop nie, maar ons sal weer gaan. Hopelik is die kleiner probleempies dan opgelos! Groetnis.

Nico dankie ver die info